Македонија треба да се стреми кон модерни хералдички решенија за својот државен грб и да не остане во малата група на земји како Белорусија, Таџикистан и Ангола, кои сè уште користат симболи со советска естетика.
Ова го истакна потпретседателот на Собранието, Антонијо Милошоски, кој нагласи дека иницијативата за измена на државниот грб не е политички мотивирана, ниту има за цел да го дефокусира вниманието од актуелните економски предизвици или од претстојните локални избори.
„Оваа иницијатива не е поврзана со никакви изборни процеси. Ако зборуваме за модерни државни симболи засновани на принципите на хералдиката, тогаш не гледам причина Македонија да продолжи да користи грб со советска симболика, каков што имаат само неколку земји во светот. Наместо тоа, сметам дека треба да создадеме современ државен грб кој ќе го одразува историското наследство на Македонија, вклучувајќи ги и вредностите на АСНОМ, Илинденското востание, како и другите значајни периоди од нашата историја. Со тоа, ќе добиеме државен симбол што ќе биде усогласен со европските хералдички стандарди и ќе ја претставува Македонија на достоен начин“, изјави Милошоски.
