Дебатата околу составот и пресметките на минималната потрошувачка кошничка повторно се актуелизираше на последната седница на Економско-социјалниот совет (ЕСС), каде што не беше постигнат договор за зголемување на минималната плата.
Главната дилема е дали методологијата што ја користи Сојузот на синдикати на Македонија (ССМ) за утврдување на минималните месечни трошоци на едно четиричлено семејство е целосно релевантна и дали одговара на реалните потреби на граѓаните.
Сепак, од ССМ, кои од 2010 година ја подготвуваат синдикалната потрошувачка кошничка, категорично тврдат дека нивните податоци се точни и реални.
Тие сметаат дека иницијативата за формирање на ново тело кое би ги вршело овие пресметки е обид да се намали улогата на синдикатите и да се спречи покачување на минималната плата, како и на останатите примања.
„Она што го критикуваат во нашата кошничка е минимално пресметано – 25 грама цреши, една чаша кока-кола или една чаша сок од портокал. Со 730 денари дневно не може да се купат ниту четири бурека и четири јогурта, а не пак да се обезбеди појадок, ручек и вечера за цело семејство“, кажа претседателот на ССМ, Слободан Трендафилов.
