Минатата недела беше пуштена во употреба обновената железничка линија меѓу Скопје и Куманово, почетните податоци укажуваат на неочекувано слаб интерес од страна на граѓаните, објави „Денар.мк“.
Според информации од железничките работници, попладневниот воз кој вчера замина од Скопје во 16:30 часот бил речиси празен, превезувајќи само еден патник.
И покрај тоа што цената на билетот изнесува само 87 денари во еден правец, што го прави возот поевтина опција во споредба со автобускиот превоз или патувањето со сопствено возило, досега граѓаните не покажале голема заинтересираност за оваа услуга.
По реакциите од јавност, се огласи и директорот Игор Корунски кој објави видео од возот кој се движел на релација Скопје – Куманово на 15 февруари и посочи дека имало патници во возот, односно некој се обидува да ги омаловажи напорите кои ги прават за враќање во функција на железничкиот сообраќај кој во изминатите години речиси целосно згасна.
„Со намера да се релативизираат и занемарат напорите за нормализирање на железничкиот сообраќај, овие денови на некои портали кружи вест дека во возот на релација Скопје – Куманово се возел само еден патник. Лесно е да се погоди кој е иницијаторот за вакви вести. Тоа се оние кои изминативе 7 години ги укинуваа железничките линии со цел Македонија да нема железница. За разлика од нив ние се радуваме на враќање на секоја укината линија и на секој еден нов патник“, напиша директорот Корунски.
