Љупчо Палевски ретко користел класична телефонска линија, но интензивно комуницирал преку мобилни апликации. Ова го покажува деталната анализа на неговите телефони, која денеска ја презентираше обвинителството, откривајќи значајни детали за неговите активности во критичниот период.
Според податоците од анализата, на денот кога, според обвинението, го застрелал Панче, Палевски имал пропуштени седум повици на апликацијата Телеграм. Неколку часа по киднапирањето на малолетната Вања, исто така, бил активен на оваа платформа. Дополнително, преку Ватсап испратил порака во која се пожалил дека не спиел цела ноќ, што обвинителството го поврзува со неговата вклученост во настаните.
Понатамошните анализи на комуникацијата откриле и јасни индиции за неговата намера за бегство. Додека престојувал во Турција, Палевски резервирал авионска карта за Минск, а во исто време најавил дека планира да замине и во Русија.
