Претседателот на Владата, Христијан Мицкоски, денеска потврди дека коалиционите партнери од владејачката структура, ВМРО-ДПМНЕ и Вреди, ја покренале иницијативата за измена на државниот грб.
„Ова прашање го отворивме затоа што Македонија е една од само две постсоцијалистички држави што сè уште користат стар грб, иако со одредени модификации“, изјави Мицкоски.
Во контекст на оваа иницијатива, Либерално-демократската партија (ЛДП) излезе со предлог новиот грб да го содржи ликот на балканскиот рис, како симбол што ја отсликува автентичноста и природното богатство на земјата.
Рисот веќе има значајна улога во националните обележја – тој е прикажан на металната монета од пет денари, беше дел од дизајнот на фудбалскиот дрес на репрезентацијата, а воедно е заштитен со повеќе меѓународни конвенции.
