Јавниот обвинител од Основното јавно обвинителство Скопје донел наредба за започнување на истражна постапка против 56-годишно лице.
Против лицето постои основано сомнение дека извршило кривично дело – грабнување, согласно член 141 став 2 во врска со став 1 од Кривичниот законик, информираат од ОЈО Скопје.
„На 8 февруари, во населбата Ѓорче Петров, осомничениот извршил грабнување на едно лице со намера со закани по живот да го присили да му го врати долгот, 8.000 денари и мобилен телефон вреден 12.000 денари.
ОЈО информира дека околу 1:30 часот по полноќ, додека оштетениот спиел дома, осомничениот со сатар започнал да ја крши влезната врата, насилно ја отворил и влегол внатре. Со закани дека ќе го убие, го удрил оштетениот со сатарот по главата, градниот кош и грбот, го присилил да се облече и го одвлекол до својот дом. Таму го заклучил и го држел присилно да не избега, постојано заканувајќи му се дека ќе го убие ако не му го врати долгот. Околу 5:30 часот кога осомничениот заспал, грабнатиот ја искористил приликата, го зел клучот и избегал, по што веднаш го пријавил настанот“, соопшти ОЈО Скопје.
