Фото: Facebook
Судскиот совет формира специјална комисија која ќе ги разгледа сите досегашни судски документи и одлуки поврзани со Васил Јованов, обвинет за учество во трагичната сообраќајна несреќа на „Партизанска“, каде ја прегази 22-годишната Фросина Кулакова.
Комисијата ќе испита дали има било какви пропусти или неправилности во судските постапки против него. Претседателот на Судскиот совет, Александар Камбовски, изјави дека ќе бидат разгледани сите јавни забелешки и ќе биде изнесен официјален став по ова прашање.
Судиите од Основниот кривичен суд во Скопје изразија длабоко жалење за трагичната смрт на Фросина, истовремено нагласувајќи дека, поради јавните реакции и контроверзната неправосилна пресуда за Васил Јованов во друг случај, сметаат дека е важно да се обратат до јавноста. Целта е да се заштити угледот на судската функција и да се разјаснат сите шпекулации и неточни информации кои се појавија во медиумите.
Судската институција исто така повика надлежните органи да испитаат дали во минатото имало пропусти во судските процеси и дали судијата бил во обврска да се изземе од случајот поради можни лични или професионални поврзаности со обвинетиот.
