Адвокатите Владо Бангиевски и Драган Малиновски во разговор со „Локално“ дадоа коментар за случајот во кој возачот Васил Јованов ја прегази 22-годишната Фросина Кулакова на „Партизанска“ во Скопје.
Адвокатот Владо Бангиевски смета дека обвинителството правилно го квалификувало делото на Васил Јованов, кој е обвинет за сообраќајната несреќа во која загина Фросина Кулакова. Според него, сите елементи на делото ги исполнуваат условите за да се квалификува како дело сторено со умисла, бидејќи обвинетиот бил свесен за последиците од своето дејствување и се согласил со можните исходи.
Во однос на можната висина на казната, Бангиевски за „Локално“ посочува дека јавниот револт е оправдан, но нагласува дека треба да се избегнуваат какви било надворешни притисоци врз судството. Тој смета дека, со оглед на тежината на делото и последиците, казната ќе биде близу максималната, но нагласува дека тоа не треба да биде направено за да се задоволи јавноста, туку за да се оствари правдата.
Драган Малиновски, правен експерт кој во разговор за „Локално“ ја изрази својата согласност со проценката за делото, вели дека не постојат речиси никакви олеснителни околности за обвинетиот.
Според него, се очекува затворска казна од неколку години, иако, како што додава, тешко е да се даде точна бројка без да се земат предвид сите околности на случајот.
Извор: Локално.мк
