Американскиот претседател Доналд Трамп продолжува да изненадува со своите предлози – овој пат предлага САД да ја преземат контролата над Појасот Газа и да го претворат во ривиера на Блискиот Исток, која ќе биде населена со различни нации. Хамас ја одби оваа идеја, нарекувајќи ја апсурдна и недостојна за разгледување.
Трамп на заедничката прес-конференција со израелскиот премиер Бенјамин Нетанјаху во Вашингтон изјави дека САД се подготвени да ја преземат контролата над Појасот Газа и да работат на создавање нови можности за економски развој во регионот.
„САД ќе ја преземат контролата над Појасот Газа и ние ќе ја завршиме работата таму“, истакна Трамп, додавајќи дека во рамки на овој план ќе се елиминираат опасни неексплодирани бомби и друго оружје, како и дека ќе се расчистат сите остатоци.
