Професорот Трајко Славески, гостувајќи вечерва во емисијата „Отворено“ на ТВ 24, изрази став дека најавениот бојкот на маркетите во петок нема да има значително влијание врз цените на производите.
Според него, регулирањето на пазарните услови е најдобриот механизам за формирање на цените, бидејќи само пазарот може да ги одреди нивните вистински вредности.
„Ова е само фолклор, а не ефикасна мерка. Она што нема да се купи во петок, ќе се набави за време на викендот, бидејќи луѓето не можат да се лишат од основните потреби. Наместо тоа, најдобриот пристап е да се споредуваат цените во различни маркети и да се избираат најповолните понуди“, истакна Славески.
Тој дополнително нагласи дека одржувањето на ценовната стабилност зависи од контролирање на инфлациските очекувања и балансирање на барањата за зголемување на платите.
„Доколку постои уверување дека цените ќе растат во иднина, тоа ќе има влијание и врз потрошувачите и врз бизнисите, што може дополнително да ја влоши инфлацијата. Освен тоа, доколку постојано се зборува за зголемување на платите, тоа само дополнително ќе го засили инфлацискиот притисок“, додаде Славески.
