Денеска во домот на семејството Пешеви во Штип беа доставени бела техника, пакети со храна и средства за хигиена, како гест на хуманост и поддршка.
Андреј Ангелов од Зрновци, младиот среќник кој го фати светиот крст за Богојавление – Водици, одлучи својот ваучер да го донира на семејството Пешеви. Ова семејство минатата година претрпе трагедија со загубата на нивната ќерка Емилија, која трагично го загуби животот.
„Ова е мојот прв хуманитарен гест, и искрено се надевам дека ќе имам можност и сила да продолжам со вакви активности. Оваа желба ја носам уште од тинејџерските години, откако ја загубив мојата мајка. Денеска не само што го донирав ваучерот, туку обезбедивме и дополнителна храна за семејството“, изјави Ангелов за Мнет ТВ.
