Директорот на Службата за општи и заеднички работи во Владата, Ивица Томовски, во своето гостување во емисијата „360 степени“ на МРТ 1, посочи на значителните финансиски загуби кои државата ги претрпела поради нефункционирањето на проектот „Македонско село“ од 2019 година наваму.
„Поради тоа што овој објект не е во функција, како и поради ненаплатената кирија, дополнителните трошоци за обезбедување и осигурување на објектот, државата досега изгубила повеќе од 20 милиони денари,“ истакна Томовски.
Тој, исто така, зборуваше за проектот за жичницата на Водно, кој е предвиден да го поврзе градот Скопје со Средно Водно и врвот на планината.
„Делот од Средно Водно до врвот е под надлежност на Град Скопје и ЈСП, додека вториот сегмент од проектот, кој треба да го поврзе манастирот ‘Св. Јован’ во Капиштец со Средно Водно, е во надлежност на Министерството за транспорт и врски,“ појасни Томовски.
