Мартин Гоџо имаше најмногу среќа меѓу стотината верници кои се натпреваруваа во осветените води на Охридското Езеро, успевајќи да го фати чесниот крст. Овој свечен чин, за првпат годинава, го изврши поглаварот на Македонската православна црква – Охридска архиепископија, архиепископот г.г. Стефан.
За Гоџо ова е втор успех во традиционалниот обичај, откако првпат го фати крстот во 2022 година, што, според него, му донело многу среќа и благослов.
Во меѓувреме, на реката Вардар во Скопје, прв до светиот крст стигна Теодор Јовевски. За него, ова беше прво искуство да го фати симболот на христијанството од осветените води.
Јовевски изрази голема радост и благодарност, нагласувајќи дека учеството и победата во оваа традиција за него имаат големо духовно значење.
