Деветгодишно дете од Свети Николе почина пред два дена на Детската клиника во Скопје. Директорот на клиниката, Реџеп Мемеди, изјави дека детето било префрлено од болницата во Штип во исклучително тешка здравствена состојба, која веќе била неповратна.
Според податоците, детето претходно било болно, страдало од дехидрација и имало симптоми на цревна инфекција.
„Детето беше примено на Одделот за детски болести во Клиничката болница во Штип на 14 јануари, околу 18 часот, со многу тешка општа состојба и нарушена свест. Веднаш беа направени биохемиски анализи и компјутерска томографија на главата. Поради сериозноста на состојбата, со медицинска придружба, истиот ден во 19 часот беше транспортирано до Универзитетската клиника за детски болести во Скопје,“ стои во соопштението на Клиничката болница во Штип.
