Фото: Принтскрин
Украинскиот претседател Володимир Зеленски објави дека пожарникарите од неговата земја се подготвени да се вклучат во борбата против катастрофалните пожари што ја зафатија Калифорнија.
„Денеска упатив инструкции до украинскиот министер за внатрешни работи и нашите дипломати да се организираат за можноста украинските спасувачи да помогнат во гаснењето на пожарите во Калифорнија. Веќе ја понудивме нашата поддршка на американската страна преку соодветни дипломатски канали, а 150 наши пожарникари се целосно подготвени за дејствување“, соопшти Зеленски на социјалната мрежа Икс.
Претседателот истакна дека состојбата во Калифорнија е исклучително критична, при што украинските екипи се подготвени да помогнат во спасување животи и заштита на имот.
„Украина, како земја која добро знае што значат катастрофи и човечка солидарност, е подготвена да ја подаде својата рака за помош“, додаде тој.
