Коалицијата „Европски фронт“ поднесе интерпелација против министерот за внатрешни работи, Панче Тошковски, наведувајќи неколку клучни причини, меѓу кои селективно постапување врз етничка основа во однос на настаните од 28 ноември, недостиг на гаранција за еднаквост и безбедност за сите граѓани, како и неспособност да се обезбеди праведност. Според коалицијата, реториката на министерот дополнително ги продлабочува етничките поделби во земјата.
Образложувајќи ја интерпелацијата во Собранието, пратеникот Елми Езири истакна дека министерот Тошковски не ги извршува своите должности на соодветен начин и треба да преземе одговорност за своите постапки.
Во својот одговор, министерот Тошковски ги отфрли обвинувањата, оценувајќи ја интерпелацијата како обид за манипулација и дефокусирање на македонската јавност.
„Не се приведуваат Албанци, Македонци, Турци или Власи, туку се апсат криминалци и ќе продолжат да се апсат. Секој што душмански го ограбувал народот ќе одговара, но тоа ќе се спроведе без спектакли, за разлика од вашето време,“ изјави Тошковски.
