Претседателката на Република Македонија, Гордана Сиљановска Давкова, донесе одлука да го стави своето прво вето на Законот за заштита на децата, одбивајќи да го потпише указот кој предвидува воведување на двојазични лиценци во градинките.
Во образложението испратено до Собранието, Сиљановска изрази загриженост за одредбите кои се однесуваат на двојазичноста, нагласувајќи дека тие се спорни и дека треба да се преиспитаат во согласност со Уставот и важечките закони за употреба на јазиците.
Претседателката се надева дека Собранието ќе ги разгледа нејзините забелешки и ќе донесе јасни и прецизни решенија кои ќе бидат во согласност со Уставот на земјата.
„Очекувам дека ќе се изнајдат решенија кои ќе бидат во согласност со највисоките правни стандарди и принципите на нашето уставно уредување“, изјави Сиљановска, додавајќи дека важно е да се обезбеди законско уредување кое ќе ги почитува правата на сите граѓани.
