Актерот Тони Михајловски јавно проговори за проблемот со загадениот воздух во Скопје, споредувајќи ја ситуацијата со живот во гасна комора. Тој истакна дека овој сериозен еколошки проблем трае повеќе од една деценија, а неговото континуирано занемарување создава опасен впечаток дека тоа е „нормално“, иако последиците врз здравјето се катастрофални.
Михајловски посочи дека ваквата состојба не само што е алармантна, туку претставува директна закана за животот и благосостојбата на граѓаните.
„Бајати вести.
Скопје/Козле завчера околу 23:30 мирисаше/смрдеше на отров. Смрдеше на “амбуланта”, на “болница”. Смрдеше на смрт.
Ги прошетав кучињата 20тина минути. Јакната ми мирисаше на отровот а и крзното на кучињата мирисаше на истото. Тоа што мирисаше можеше и да се види во воздухот. Како во гасна комора. Децата ни кашлаат, болниците се полни, се гушиме. И така е 15/20/25год?
И не ни пречи. Никому не му пречи. Можеби континуитетот го нормализира ненормалното, можеби сме заљубени во џелатот, или едноставно сме се “навлекле” на смрадот.
Додуше мене ми пречи, ама мене тоа ми е заради астмата. Отидов да си купам “дишало” Фостер, ама немав со себе копија од потврда од на мајка му фрчилото дека имам астма. Нема потврда, нема дишало. Таков е системот. А ме има во “системот” дека имам астма, ама немам потврда. Копија која треба да ја носам со себе кога сакам да земам нова пумпи*ка.
И тоа е направено така за да не се злоупотребува Фостер пумпи*ката. Можам на пример да се излечам од астма а сеуште да земам пумпи*ка и да ја препродавам. Или да ја давам на делење. По едно пафче/димче за одредена цена. Сиромав чо’ек, жив ѓа’ол. На мајка му пумпи*ката кој и да го смислил системот. Си купив Вентолин. Брка работа а и нема да станам првиот дилер на Фостер пумпи*ка во нашата земја.
Нејсе, на вести јавија дека доцнат авионите од Истанбул. Шуќур. Полесно се дише кога имаш таква информација.
п.с. Се прашувам тие што го одобриле тоа, очигледно горење на нечиј отпад, дали имаат деца, и дали нивните деца дишат некој друг воздух?“, објави актерот.
