Скопје утринава повторно се истакна како еден од најзагадените градови во Европа, според податоците објавени од швајцарската платформа за мониторинг на квалитетот на воздухот „IQAir“. Главниот град на Македонија се наоѓа на деветтата позиција на глобалната листа на најзагадени градови, и е единствениот претставник од регионот.
Индексот на загаденост во Скопје изнесува 170, што го сместува воздухот во категоријата „нездрав“. Според мерењата, концентрацијата на ПМ2,5 честичките достигнува 82 микрограми на метар кубен, што е 16,4 пати над максимално дозволената граница поставена од Светската здравствена организација (СЗО).
Дополнително, измереното ниво на ПМ10 честичките е исто така високо, достигнувајќи 123,2 микрограми на метар кубен. Овие бројки се показател за сериозноста на состојбата со аерозагадувањето во Скопје, кое продолжува да претставува значителна закана за здравјето на неговите жители.
