Јавното претпријатие за државни патишта најави дека утре официјално ќе биде пуштен во употреба новиот експресен пат на релацијата Крива Паланка–Страцин.
Во изминатиот период, интензивно се работеше на завршување на овој важен инфраструктурен проект, со активности спроведувани и ден и ноќ, дури и во тешки зимски услови. Резултатот е современ и безбеден експресен пат со должина од 25,5 километри, кој овозможува дозволена брзина од 110 км/ч. Овој патен правец има големо значење за локалното население, но и пошироко, бидејќи е дел од стратегискиот Коридор 8 што ги поврзува истокот и западот на државата.
Вкупната инвестиција за изградбата изнесува 102 милиони евра. Од нив, 88 милиони евра се обезбедени преку заем од Светска банка, а дополнителни 14 милиони евра се грант средства од Инвестицискиот фонд за Западен Балкан.
Патот е изграден со модерна инфраструктура, вклучувајќи 3 клучки, 3 мостови, 13 вијадукти, 9 надпатници, 44 косини, како и 36 цевасти и 14 плочести пропусти. Ширината на патот е од 11,4 до 12,5 метри, што го прави погоден за побрз и побезбеден сообраќај.
