Вчера во Швајцарија официјално стапи на сила законот што го забранува покривањето на лицето на јавни места, наречен „забрана за бурка“.
Според новите регулативи, секое прекршување на овој закон може да биде санкционирано со глоба од најмногу 1.000 швајцарски франци, што е еквивалентно на околу 1.064 евра, пренесува „Свисинфо“.
Законот беше донесен како резултат на иницијатива која во март 2021 година доби поддршка од 51,2 отсто од гласачите на национален референдум. Иако целта на законот е ограничување на целосното покривање на лицето, постојат исклучоци. Покривањето ќе биде дозволено во случаи на безбедносни потреби, временски услови или здравствени причини. Исто така, законот дозволува носење на покривки за лице за уметнички, забавни или промотивни активности.
Покрај оваа регулатива, од 1 јануари Швајцарија воведува и засилени мерки за борба против детските бракови, зајакнувајќи ги правните рамки за заштита на правата на децата и спречување на раните бракови.
