Инспекторите од Агенцијата за храна и ветеринарство (АХВ), во рамки на редовните контроли на магацини, маркети и продавници, откриле неколку неправилности во врска со новогодишните пакетчиња.
Од вкупно спроведените 62 вонредни контроли, на две локации се пронајдени пакетчиња кои содржеле производи со истечен рок на траење, како и производи со многу краток рок на употреба, кој истекува до декември 2024 година.
Дополнително, според наодите на АХВ, инспекторите утврдиле дека кај некои пакетчиња, и покрај тоа што рокот на траење на производите бил во рамките на дозволеното, биле забележани промени во бојата, изгледот и мирисот, што укажува на можни нарушувања на квалитетот или складирањето.
На четири оператори е утврдено несоодветно означување на пакетчињата, при што кај три вида пакетчиња е констатирано дека на збирното пакување недостига информација за рокот на траење или датумот на минимална трајност на производите што ги содржат.
