Амбасадата на Република Македонија во Германија информираше дека двајца македонски лекари, Златко Станковски и Владимир Митевски, кои се вработени во болницата во Магдебург, дале значаен придонес во згрижувањето на повредените за време на трагичниот напад на божиќниот панаѓур во овој германски град.
„Изразуваме гордост за нашите сограѓани, д-р Златко Станковски и д-р Владимир Митевски, кои со својата посветеност и професионалност помогнаа во спасување на човечки животи. Д-р Станковски, роден во Прилеп, и д-р Митевски, кој потекнува од Радовиш, се врвни специјалисти по интерна медицина и интензивна нега. Нивната брза реакција и стручност беа од клучно значење во згрижувањето на повредените во оваа трагедија,“ соопшти Амбасадата на Македонија во Германија.
