Косовскиот премиер Аљбин Курти, за време на својата посета на Сараево, истакна дека регионот на Западен Балкан се соочува со сериозни предизвици за стабилноста, кои, според него, произлегуваат од „експанзионистичките амбиции на Србија“ и од последиците од руската агресија врз Украина.
Курти предупреди дека конфликтот во Украина може да има сериозни импликации за Југоисточна Европа, со потенцијално ширење на нестабилноста и безбедносните ризици.
„Инвестираме во зајакнување на нашите вооружени сили затоа што сè уште има лидери на Балканот кои се стремат кон поделби и територијална експанзија“, изјави Курти, нагласувајќи ја важноста на стабилни и мирни односи во регионот. Според него, концептот на таканаречениот „српски свет“ претставува ништо друго освен проект за создавање на „голема Србија“, што е закана за регионалниот мир и соработка.
„Косово има абнормални односи со Србија бидејќи Србија не е нормална држава“, додаде Курти.
