Претседателот на Србија, Александар Вучиќ, изрази благодарност за секоја можност за напредок во процесот на европска интеграција, но истакна дека Србија ќе продолжи да се бори и да разговара со сите членки на Европската унија, без оглед на резултатите од последните одлуки.
Во изјава за РТС, Вучиќ рече: „Благодарни сме ако го отворат Кластерот 3, благодарни сме дури и ако не го отворат. Најважно е да останеме посветени на дијалогот и реформите.“
Оваа изјава доаѓа откако амбасадорите на земјите-членки на ЕУ не постигнаа согласност за отворање на Кластерот 3, што се однесува на конкурентност и внатрешен пазар, во рамките на преговорите за пристапување на Србија. Вучиќ нагласи дека Унгарија ќе закаже нова средба следната недела и изрази увереност дека ќе се продолжи со дискусиите.
На последната седница, против отворањето на овој кластер се изјаснија Шведска, Финска, Холандија, како и соседните Хрватска и Бугарија.
„Ако ме прашате што им згрешивме на Бугарите, навистина не би знаел како да одговорам. Иако разбирам дека постојат други причини, никогаш не очекувам тие да бидат официјално изречени. За односите со Хрватска, сè ми е јасно и немам проблем да ги разбирам нивните позиции,“ изјави Вучиќ.
