Кире Науновски од Свети Николе остави незаборавен впечаток во последната епизода на популарното шоу „Никогаш не е доцна“. Овој 45-годишен Македонец, кој со својот талент ги воодушеви членовите на жирито и публиката, откри дека учеството во регионалното музичко натпреварување било негова голема желба.
Кире сподели дека љубовта кон музиката ја носи од мали нозе, а првите посериозни настапи ги имал на 16-годишна возраст, пеејќи на свадби и други веселби.
„Музиката е мојот живот. Никогаш не размислував за друга професија, ниту, пак, посакав да се занимавам со нешто различно. Единствен предизвик со кој секогаш се соочувам е мојата срамежливост и тремата која и денеска ја чувствувам“, изјави Науновски.
Веќе 15 години, Кире живее во хармоничен брак со својата сопруга, која, како што вели, е неговата најголема поддршка. Таа има огромно разбирање за неговата работа, која вклучува редовни настапи по кафеани и веселби. Нивниот семеен живот е исполнет со љубов, а најголемата гордост им се двете деца, кои ги воспитуваат според традиционалните вредности.
Настапот на Кире во шоуто доби високи оценки од жирито. Едо Абдовиќ го опиша како вистински професионалец, додека Саша Милошевиќ истакна дека е пејач со извонредна дикција и техника. Со ваков силен почеток, Науновски успеа да освои многумина и да ја зацврсти својата позиција како еден од фаворитите во шоуто.
