Основното јавно обвинителство во Скопје издаде Наредба за спроведување истражна постапка против 41-годишен маж од Скопје, кој е осомничен за извршување на кривично дело „Тешки дела против општата сигурност“, согласно член 292 став 1 во врска со член 288 став 3 и став 1 од Кривичниот законик.
Според наодите од истрагата, на 25 ноември осомничениот со умисла предизвикал пожар во просториите на Адвокатската комора на Република Северна Македонија, лоцирани на улицата „Методија Шаторов – Шарло“. Овој чин создал сериозна опасност по животот и здравјето на луѓето, како и значителна материјална штета на имотот во зградата.
Истрагата утврдила дека осомничениот една недела пред инцидентот набавил предмети за подготовка на криминалниот чин, меѓу кои и секира со гумирана рачка, плинска запалка, заштитни ракавици и 48 коцки со керозин за потпалување. На критичниот ден, тој пристигнал во близина на зградата со сопственото возило, носејќи фантомка како маска. Со секира ја скршил влезната врата, поставил керозински коцки на скалите, врз нив наредил неколку плински боци и потоа ги запалил со плинската запалка.
Како резултат на предизвиканиот пожар, станбената зграда претрпела штета проценета на околу 9.255.000 денари. Среќа во несреќата е што немало повредени лица, но жителите на зградата биле изложени на голем ризик.
Само половина час по извршувањето на делото, осомничениот со своето возило ја напуштил државата преку граничниот премин „Блаце“. Органите на прогонот продолжуваат со напорите за негово лоцирање и враќање во земјата со цел изведување пред лицето на правдата.
