Комплексот „Македонско село“ во Горно Нерези, кој остана затворен шест години, се очекува напролет повторно да ги отвори своите врати за посетителите.
Владата најави дека до крајот на месецов ќе биде објавен јавен оглас за изнајмување на овој уникатен објект, кој ќе се додели под закуп на приватна компанија. Новиот закупец ќе биде одговорен за рестартирање на угостителските капацитети, обезбедување на квалитетни туристички услуги, како и за ставање во функција на автентичните куќи кои го претставуваат богатството на македонските региони, вклучувајќи и можности за ноќевање.
Овој значаен туристички проект, официјално отворен во 2016 година, беше замислен како репрезентативен простор за промоција на македонската култура и традиција. Сепак, активностите во комплексот престанаа во 2018 година, кога претходниот концесионер, компаниите „Тинекс“ и хотел „Квинс“, се повлекоа поради финансиски загуби.
Фото: Dule Damjanovski
