Во буџетот се предвидени средства за зголемување на минималната плата, вклучително и за потенцијално зголемување во декември, како што бара Синдикатот, покрај законското зголемување од 2.000 денари планирано за март следната година.
Министерот за економија, Бесар Дурмиши, изјави дека има политичка волја за зголемување на минималната плата на 450 евра, што го бара Синдикатот, и потенцијално на 600 евра, но тоа ќе зависи од постигнување договор во рамките на Економско-социјалниот совет и од законските измени што би следувале.
„Доколку постигнеме согласност на Економско-социјалниот совет за зголемување на минималната плата, ќе биде неопходно да се направат измени во Законот за минималната плата. Со тоа, може да се реализира покачување на минималната плата на 450 евра. Што се однесува до мене, јас лично би сакал минималната плата да изнесува 600 евра,“ истакна министерот Дурмиши.
Прашањето за зголемување на минималната плата ќе биде клучна тема на следната седница на Економско-социјалниот совет, закажана за декември. Овој потег има за цел да ја подобри финансиската состојба на најзагрозените категории граѓани и да придонесе за подигнување на животниот стандард.
