Премиерот Христијан Мицкоски најави дека до следната летна или есенска сезона во земјава се очекува воведување на 100 до 120 нови електрични автобуси, кои ќе бидат дел од јавниот градски превоз во општините каде што таквиот превоз е организиран.
– Во моментот вршиме анализа на пазарот за да утврдиме колку брзо може да се набават овие автобуси. Исто така, размислуваме за финансискиот модел, со опција за плаќање со одложен рок и во неколку полугодишни рати, со цел да избегнеме дополнителен притисок врз ликвидноста на државниот Буџет. По набавката, автобусите ќе бидат распределени на општините со јавен градски превоз, заедно со соодветната инфраструктура, како полначи за електрични возила. Пресметавме дека ќе бидат потребни околу 50 полначи за целосна поддршка на новиот систем – изјави Мицкоски, одговарајќи на новинарско прашање при отворањето на новата спортска сала во ООУ „Наум Охридски“ во селото Булачани, Скопско.
Овој проект претставува дел од заложбите за модернизација и зелена транзиција во јавниот транспорт, кој треба да придонесе за намалување на загадувањето, подобрување на енергетската ефикасност и зголемување на квалитетот на превозот за граѓаните.
