Јавен обвинител од Основното јавно обвинителство Скопје отвори истражна постапка против лице осомничено за сторено кривично дело – Убиство во обид, согласно член 123 став 2 точка 1 во врска со член 19 од Кривичниот законик.
Според досегашните информации, на 14 ноември, околу полноќ, осомничениот, во состојба на алкохолизираност, го убедил оштетениот да влезе во неговиот автомобил под претекст дека сакаат да разговараат.
Осомничениот го однел во својот дом, каде пред присуство на сопругата и двата сина извадил огнено оружје и започнал да пука кон оштетениот, нанесувајќи му повеќе повреди. Брзата реакција на сведоците го спасила оштетениот, кој бил пренесен во болница за укажување на медицинска помош.
Поради сериозноста на делото и постоењето на ризик од бегство, влијание врз сведоците или можност осомничениот да го доврши обиденото дело, јавниот обвинител предложил до Основниот кривичен суд во Скопје да се изрече мерка притвор за осомничениот.
