Министерството за внатрешни работи (МВР) интензивно спроведува обемни активности за пронаоѓање на 43-годишната Лидија Трајковска, која мистериозно исчезна на пат кон селото Драчево. Според достапните информации од МВР, Трајковска последен пат била забележана во близина на крстосницата во селото Јурумлери, откаде тргнала кон нејзината крајна дестинација – Драчево.
Полицијата ги истражува сите можни места на нејзиното последно забележано движење, а во потрагата се вклучени и членови од нејзиното семејство.
Во близина на мостот на реката Вардар, полициски екипи пронашле неколку лични предмети, меѓу кои кутија од цигари, запалка и џемпер. Сопругот на Лидија потврдил дека кутијата и запалката ѝ припаѓале, но џемперот не го препознал како нејзин.
Потрагата продолжува долж брегот на реката, каде што полицијата и нејзините блиски заеднички ги пребаруваат околните подрачја во надеж дека ќе се пронајдат нови траги.
„За да се опфати поширока област околу реката Вардар, МВР вклучи дрон за аеропреглед на теренот, кој покрива зона од пет километри, од селото Јурумлери до селото Огњанци. Дополнително, полицијата темелно пребарува и напуштени објекти во поширокиот реон. Сите ресурси се мобилизирани со цел што поскоро лоцирање на исчезнатата жена“, истакнаа од МВР.
