Фото: Принтскрин
Победата на Доналд Трамп на претседателските избори во САД отвора ново поглавје во односите меѓу Македонија и најмоќната светска држава. Како политичка фигура која предизвикува голем интерес и контроверзии на меѓународната сцена, Трамп ќе има влијание врз геополитичките, економските и безбедносните односи на глобално ниво.
Ова неизбежно ќе има последици и за помалите земји, вклучително и Македонија. Со оглед на стратешката соработка со САД, посебно во областите на безбедноста, економијата и енергетиката, победата на Трамп носи прашања, но и можности за Македонија.
Како ќе се одвиваат овие односи под неговото водство и какви промени може да се очекуваат на билатерално ниво, останува да се види во следните години. Иако во однос на нашито евроинтегративен пат, не се исклучува можноста за посредување од страна на Стејт Департментот за деблокада на процесот.
Поранешниот амбасадор во САД Васко Наумовски и аналитичарот Марко Трошановски во изјави за „МИА“ истакнуваат дека САД можат да играат значајна улога во понатамошниот развој на интеграциите на Македонија кон Европската Унија.
„Секако дека може да се очекува поддршка од Стејт департментот, како што беше случај и досега во однос на нашиот евроинтегративен процес. Сепак, во контекст на војната во Украина, Бугарија, како држава со важна геополитичка позиција на источниот фронт, добива поголемо значење. Ова, несомнено, влијае и врз ставот на САД во спорот меѓу Македонија и Бугарија, при што американската поддршка не секогаш може да биде во наша корист, бидејќи ќе тежнее кон Бугарија. Дали новата администрација ќе преземе поголеми чекори во решавањето на овој спор? Мислам дека постои интерес и од страна на европските лидери и од Америка да се иницира модалитет кој ќе овозможи уставните измени. Но, тоа најверојатно ќе се случи откако Бугарија ќе формира стабилна влада, бидејќи во моментов недостига реален соговорник од другата страна“, истакнува аналитичарот Марко Трошановски во изјава за „МИА“.
