Денеска во Куманово, во координација со Одделот за криминалистичка полиција при МВР, СВР Куманово спроведе акција за расчистување на случај на „примање поткуп“, во согласност со член 357 од Кривичниот законик. Во оваа акција, која беше иницирана по наредба на Основното јавно обвинителство Куманово, беше уапсена Л.Т., градежен инспектор во општина Куманово, поради сомневање дека примила поткуп во висина од 4.000 евра.
На 25 септември 2024 година, граѓанин поднел пријава во СВР Куманово во која изјавил дека инспекторката Л.Т., при извршување контрола на објект во изградба што го поседувал оштетениот, забележала неправилности и побарала поткуп. Според наводите, таа првично барала 1.500 евра за да не издаде решение за запирање на градежните работи и да не поднесе пријава до релевантните институции. Подоцна, на 31 октомври 2024 година, сумата била зголемена на 4.000 евра.
По пријавата, Основното јавно обвинителство Куманово било известено, по што биле преземени соодветни мерки. На оштетениот му биле предадени технички обработени пари, кои тој денеска ги предал на Л.Т. во ресторан во Куманово. Веднаш откако Л.Т. ги примила парите, била уапсена од полициските службеници на терен.
