Министерството за здравство соопшти дека вчера на хируршките клиники беше успешно извршена уште една трансплантација на органи од починат донор. Овој благороден чин стана можен благодарение на хуманоста, храброста и сочувството на семејството кое даде согласност да ги донира органите на својот ближен.
Двајца пациенти, кои имаат ретка крвна група, добија бубрези и сега можат да продолжат со нормален живот, ослободени од потребата за дијализа.
„Во тек на изминатото деноноќие извршивме трансплантација од починат донор. Изразувам посебна благодарност на семеството на донорот, кои во најболен момент на лична загуба, се одлучија да ги донираат органите, покажувајќи силна емпатија и човекољубие кон пациентите кои чекаат трансплантација. Пациентите кои примија органи се со уреден постоперативен тек. Им посакувам брзо закрепнување и долг живот. Изразувам благодарност и на медицинските тимови од сите клиники кои беа вклучени во процесот на трансплантација“, изјави проф.д-р Билјана Кузмановска, национален координатор за трансплантација.
