Од рано утринава, жителите на Кочани го блокираа патот кој води кон градската депонија, спречувајќи поминување на комуналните возила за одлагање отпад. Протестот е резултат на постојаните проблеми со загадувањето, вклучувајќи редовни пожари на депонијата и испуштање на токсичен чад, што значително влијае на квалитетот на животот во градот.
„Не знам зошто соседните општини, како Виница, Зрновци и Чешиново-Облешево, ги затвораат своите депонии, а ние мораме да поднесуваме колективно одлагање на отпадот“, изјави Стојан Глувчевски, жител на Кочани. Тој додаде дека е неопходно да се реши проблемот со загадувањето, кое носи сериозни здравствени последици.
Благица Сабовљевиќ, друга жителка на Кочани, истакна дека ситуацијата веќе не е од интерес само за иднината, туку и за сегашноста на жителите и нивните деца. Жителите од село Бели, кои живеат во непосредна близина на депонијата, бараат трајно решение, било со дислокација или затворање на депонијата.
„Ова е ненормално. Ние ќе останеме тука 24 часа и не ќе ги пуштиме камионите со отпад“, изјави жител од село Бели.
Во текот на протестот, граѓаните се сретнаа со раководството на ЈКП „Водовод“, кое ги увери дека е ангажирана механизација за затрупување на отпадот, а на влезот на депонијата е поставено 24-часовно дежурство за контрола на неовластено влегување.
