В сабота започнува протестниот марш под мотото „За чист воздух“, кој ќе тргне од просториите на Министерството за животна средина и просторно планирање, ќе продолжи пред Собранието и Владата, а ќе заврши пред зградата на Град Скопје.
Организатор на протестот е иницијативата „Шанса за Центар“, која заедно со неколку граѓански организации се залага за итни мерки против загадувањето. Од иницијативата истакнуваат дека, и покрај протестот одржан на 10 декември, надлежните институции сè уште немаат дадено конкретен одговор на нивните барања за намалување на загаденоста на воздухот.
„Секоја година во Македонија повеќе од 3.800 луѓе умираат како директна последица од изложеноста на штетните честички PM 2,5, што претставува дури 17,7% од вкупната смртност во земјата. Особено загрижува фактот дека едно од девет починати бебиња под една година го губи животот поради загадениот воздух“, се вели во повикот за маршот.
