Лидерот на Демократската унија за интеграција (ДУИ), Али Ахмети, на традиционалниот новогодишен прием испрати силна порака за зачувување на меѓуетничките односи и повика на еднаквост и праведност за сите заедници во земјата.
„Секогаш сме биле покрај Македонците во најразлични ситуации и ќе продолжиме да бидеме, но нема да прифатиме улога во која тие ќе бидат аги, а ние слуги,“ истакна Ахмети.
Според него, вистинскиот напредок е можен само со целосна реформа на судскиот систем, кој треба да биде непристрасен и да се води исклучиво според законите, а не според етничката припадност на граѓаните.
„Додека немаме вистински ветинг и независно судство, кое ќе носи одлуки според законите, а не според етничката позадина, нашата борба ќе продолжи. Без оглед на политичките чистки и турбуленциите кои ги создаваат, ДУИ останува силен ураган што ќе ги брани интересите на сите граѓани,“ додаде тој.
Ахмети го потенцираше значењето на меѓуетничките односи како клучен фактор за стабилноста и иднината на државата. Тој ги повика политичките партии СДСМ и ВМРО-ДПМНЕ да работат за доброто на сите граѓани, подвлекувајќи дека Македонија не е иста како во 1989 година.
„Охридскиот рамковен договор е фундамент што ја спречи трагедијата и отвори пат за дијалог и мир. Без разлика на компромисите што ги направивме, тој договор е гарантиран од ЕУ и САД. Загрозувањето на Охридскиот договор значи опасност за мирот, стабилноста и безбедноста не само на земјата, туку и на целиот регион,“ предупреди Ахмети.
Ахмети беше дециден дека ќе се спротивстават на секој обид за промена на Законот за јазиците, кој го смета за клучен за зачувување на меѓуетничката хармонија.
„Не сакаме конфликти, сакаме напредок. Нашата цел е интеграција во Европската унија, а не враќање кон практики што ќе ја загрозат стабилноста. Ние ќе пружиме невиден отпор на секој обид за нарушување на нашите права,“ изјави Ахмети.
