Во рамките на голема полициска акција спроведена од Министерството за внатрешни работи (МВР), утрово се извршени претреси на повеќе локации, поврзани со сомнежи за организиран криминал во рамките на Лотарија на Македонија. Меѓу целите на акцијата беше и домот на поранешниот вицепремиер Артан Груби, но според информациите, тој не бил пронајден дома, објави „Република“.
Груби, преку објава на социјалните мрежи, потврди дека се наоѓа во Косово, но категорично негира дека е во бегство.
„Не сум пребегнал, планирам наскоро да се вратам,“ изјави тој. Груби веќе е под истрага за друг случај, во кој се сомничи за вмешаност во неправилности во судски процес, што го доведе и до вклучување на американската „црна листа“.
Дополнително, акцијата се прошири и кон поранешниот директор на „Лотарија на Македонија“, Прпарим Бајрами, кој исто така не бил пронајден во својот дом, објави „Република“. Постојат сомнежи дека Бајрами избегал во Косово пред неколку месеци, а неговото семејство, наводно, ветило дека тој ќе се врати за да соработува со властите.
