Бугарија нема да ја предаде на македонските власти 23-годишната Ива Михаилова од Кочани, по која Северна Македонија распиша меѓународна потерница. Ова го соопшти бугарскиот министер за внатрешни работи Иван Демерџиев.
Сепак, во текот на интервјуто, Демерџиев направи забележителен лапсус, наведувајќи дека Бугарија нема да ја екстрадира Михаилова на српските власти, наместо да ги спомене македонските институции.
Откако новинарот го праша дали станува збор за ненамерна грешка или свесно споменување на Србија, министерот призна дека погрешил. Сепак, тој оцени дека станува збор за грешка што, според него, не е толку голема.
Случајот со Михаилова е поврзан со сообраќајна несреќа во која животот го загуби 33-годишниот Бесим Дурмиши. Таа е обвинета за учество во несреќата, а по неа македонските власти распишаа меѓународна потерница.
Веста ја пренесува Infomax.mk
