Младата математичарка Софија Ѓорчева од Кавадарци продолжува да ги ниже успесите на меѓународната сцена. На финалето на престижниот натпревар „Математика без граници“, кое се одржа во Несебар, Бугарија, таа оствари извонреден резултат, освојувајќи три значајни признанија и уште еднаш потврдувајќи дека припаѓа на самиот врв меѓу младите математички таленти.
Во силна меѓународна конкуренција, Софија го освои златниот пехар во најпрестижната категорија „Ludovico Ferrari“, златен медал во тимската конкуренција и сребрен медал во индивидуалното финале. Овие достигнувања се резултат на долгогодишна посветеност, континуирана работа и исклучителни математички способности.
До настапот во финалето таа стигна по четири квалификациски циклуси, во кои секојпат беше наградена со златен медал. На натпреварот учествуваа илјадници ученици од 46 држави, што дополнително ја нагласува тежината и вредноста на нејзиниот успех.
Љубовта на Софија кон математиката започнала уште во четврто одделение. Оттогаш редовно освојува максимален број поени на општинските и регионалните натпревари, има бројни државни признанија и е редовен учесник на Македонската математичка олимпијада, каде што постојано ги потврдува своите знаења и способности.
Покрај домашните успеси, Софија е и сребрена медалистка на меѓународниот натпревар International Youth Math Challenge (IYMC), каде што го постигна најдобриот резултат меѓу сите натпреварувачи од Македонија.
Нејзиниот најнов успех претставува уште една потврда дека упорноста, трудот и знаењето носат врвни резултати. Софија Ѓорчева е вистински пример за младите генерации и гордост не само за Кавадарци, туку и за цела Македонија.
Веста ја пренесува Crnobelo.com
