Фото: Принтскрин
Февруари донесе нов раст на трошоците за живот и дополнителен притисок врз семејните буџети. Според најновите податоци на Сојузот на синдикати на Македонија, синдикалната минимална потрошувачка кошница овој месец изнесува 67.382 денари – што е за 969 денари повеќе во споредба со јануари.
Уште потешка е состојбата за семејствата што живеат под кирија. Ако се пресмета изнајмување стан од 60 квадратни метри, минималните месечни трошоци достигнуваат 82.757 денари. Тоа значи дека за основни потреби – храна, сметки, превоз и домување – се потребни значително повеќе средства отколку што голем дел од граѓаните заработуваат.
Најголемото поскапување повторно доаѓа од храната. Додека во јануари за основни прехранбени производи биле потребни 24.211 денари, во февруари таа сума пораснала на 25.156 денари – речиси илјада денари повеќе за само еден месец.
Од синдикатот предупредуваат дека ваквиот раст на цените практично го поништува најавеното усогласување на минималната плата што треба да се реализира во март. Нивните пресметки покажуваат дека едно четиричлено семејство од почетокот на годината е во минус од околу 2.000 денари. Во споредба со период од пред две години, вредноста на минималната синдикална кошница е зголемена за над 10.000 денари.
Претседателот на ССМ, Слободан Трендафилов, бара минималната плата да достигне 600 евра, а останатите примања да се зголемат за најмалку 6.000 денари. Од синдикатот испратија порака дека очекуваат договор со Владата и работодавачите до крајот на месецот, во спротивно најавуваат протести и можност за генерален штрајк.
