Трагичната смрт на младата Фросина Кулакова во 2024 година на булеварот Партизански Одреди во Скопје остави длабока рана кај семејството, но и кај целата јавност. Нивната болка, како што вчера јавно истакна нејзиниот татко, ја носи силната порака за значењето на превенцијата и безбедноста во сообраќајот.
„Сите оние кои го критикуваат системот Сејф Сити, дали се свесни дека детето ангел Фросинче и многу други стотици жртви ќе беа живи ако тогаш имавме ваков систем?“ – прашува таткото на Фросина, истакнувајќи дека во Македонија бројот на жртви во сообраќајот е три до пет пати поголем од просекот во Европа. Тој додава дека скоро секој ден сообраќајот зема еден човечки живот, а многу од овие случаи не се официјално регистрирани.
Таткото на Фросина истакнува дека, по трагедијата, најголема предизвикувачка борба се води со институциите кои, според него, ретко даваат адекватна правда и казна за сторителите, оставајќи семејствата со чувство на неправда и понижување. „Превенцијата е најбитната работа. Ако го имавме Сејф Сити, протуви и ладнокрвни возачи како Васо Јованов немаше да ги има“, заклучува тој.
Системот „Сејф Сити“ е во пробен период и се доуредува, со што голем дел од критиките произлегуваат од незнаење дека казните и санкциите се уште не се целосно активни. Семејството на Фросина апелира до граѓаните да ја разберат важноста на системот и да ја поддржат неговата имплементација, бидејќи, како што порачува таткото, превенцијата може да спаси човечки животи.
