Јавното претпријатие „Комунална хигиена – Скопје“ во текот на вчерашниот ден и ноќ реализираше акција за собирање и транспорт на отпадот од повеќе делови на главниот град. Екипите работеа на булеварите Гоце Делчев, Партизански одреди и Митрополит Теодосиј Гологанов, како и на улиците Даме Груев, Џон Кенеди и во повеќе делови од општина Аеродром.
Според информациите од претпријатието, во текот на оваа операција биле собрани вкупно 350 тони комунален отпад.
Од „Комунална хигиена“ информираат дека сè уште немаат добиено одговор од градоначалниците на скопските општини за тоа каде го одлагаат отпадот кој, според нив, се собира преку општинските служби. Во соопштението се додава дека во текот на вчерашниот ден не било забележано подигнување на отпад од страна на општинските комунални претпријатија на територијата на Скопје.
