Приказната на малата Хана е приказна за едно мало девојче кое уште од првите денови од животот се соочува со огромни здравствени предизвици. Нејзината најголема желба е да добие можност за посреќно и поздраво детство, но за тоа ѝ е потребна нашата поддршка.
Хана е родена предвреме, во 30-тата гестациска недела, со тежина од само 1.370 грама. Наместо безгрижните први денови со семејството, таа започнала тешка борба за живот. Само два дена по раѓањето престанала да дише, по што следувале месеци поминати во интензивна нега, приклучена на медицински апарати.
Дури по 119 дена болничко лекување, кон крајот на јануари, Хана конечно била пречекана во својот дом.
Но, здравствените предизвици не завршиле тука. Таа се соочила и со менингитис, а на возраст од четири месеци морала да биде оперирана поради хидроцефалус – состојба при која се насобира течност во мозокот. За да се регулира состојбата, ѝ бил вграден шант, специјално цевче кое ја одведува вишокот течност.
Покрај сето ова, Хана има и сериозен проблем со видот, односно комплицирана катаракта, а на едното око воопшто не гледа.
Денес, на една година и два месеци, пред малата Хана претстои уште една важна битка. Потребни ѝ се операции на очите во странство, специјалистички прегледи, физикална терапија и соодветна рехабилитација.
Трошоците за неопходното лекување се големи, а семејството не е во можност самостојно да ги обезбеди потребните средства.
Нејзиниот татко има само една желба – неговата ќерка да ја добие шансата за живот и детство какво што заслужува.
Секој придонес, без разлика на износот, може да биде чекор поблиску до потребното лекување. Доколку не сте во можност да донирате, споделувањето на оваа приказна исто така може да помогне да стигне до луѓето кои можат да подадат рака.
Да ѝ помогнеме на Хана да продолжи да се бори. Да ѝ дадеме шанса за подобра иднина, се вели во апелот на PavelAndreev.ORG Македонија.
