Инцидент во бугарската престолнина Софија предизвика остри реакции во јавноста, откако новинарката Соња Колтуклиева беше турната на тротоарот од припадник на Националната служба за обезбедување. Настанот се случил додека таа се обидувала да ѝ постави прашање на претседателката на бугарското Народно собрание, Михаела Доцова.
На видеоснимка што се прошири на социјалните мрежи се забележува како Колтуклиева ја отвора вратата од службениот автомобил во кој се наоѓала Доцова. Во тој момент интервенира припадник на обезбедувањето, кој ја турка новинарката на земја.
Според информациите објавени во бугарските медиуми, новинарката по инцидентот била пренесена во болница поради здобиените повреди.
Настанот предизвика реакции на политичката сцена, а се појавија и барања за оставка на претседателката на парламентот. Во меѓувреме, Националната служба за обезбедување покрена итна проверка за да се утврдат околностите и начинот на постапување на нејзините припадници.
За случајот е известено и надлежното Воено обвинителство, кое треба да постапува во рамките на своите надлежности.
Веста ја пренесува Infomax.mk
