Страшна трагедија ја потресе украинската област Харков, откако руски дрон-камиказе погоди цивили во парк во местото Нова Водолаха. Во нападот животот го загубија шест лица, меѓу кои и едногодишната Ангелина и нејзината мајка Ина Мариухна.
Малата Ангелина била во својата количка кога дронот го погодил подрачјето во близина на локално кафуле, каде што се наоѓале цивили. Нејзината мајка Ина, која работела како наставничка во основно училиште, со тешки повреди била пренесена во болница. И покрај напорите на лекарите, таа починала кратко по својата ќерка.
Меѓу жртвите е и уште едно девојче, на возраст од само 11 години. Според украинските служби за спасување и локалните власти, во нападот биле повредени најмалку 15 лица, од кои седум се деца.
Фотографиите направени по нападот сведочат за последиците од трагедијата. На улицата, меѓу паднатите есенски лисја, останала оштетена детска количка, прекриена со ќебе.
Наспроти потресните сцени од местото на нападот, семејните фотографии ја прикажуваат Ангелина како насмеано бебе во прегратките на својата мајка. Девојчето било родено во август 2025 година.
По нападот се огласи и украинскиот претседател Володимир Зеленски, кој го осуди дејствувањето на руските сили и повика на итна помош за заштита на цивилното население.
Тој истакна дека дронот директно погодил луѓе во паркот, нагласувајќи дека зад фотографиите од нападот стојат уништени животи и семејства погодени од војната. Зеленски упати сочувство до блиските на загинатите и повторно побара засилување на украинската противвоздушна одбрана.
Украинскиот претседател упати апел и до меѓународната заедница, особено до Соединетите Американски Држави и европските земји, да не ја ублажуваат политиката кон Москва додека продолжуваат нападите врз цивилите.
Според Зеленски, санкциите против Русија треба да останат на сила сè додека трае насилството, а меѓународниот притисок треба да се искористи за запирање на војната.
Смртта на мајката и нејзиното мало девојче е уште еден трагичен потсетник на цената што цивилното население ја плаќа во војната во Украина.
Веста ја пренесува Index.hr
