Хрватската музичка сцена загуби едно од своите препознатливи имиња. Мирко Цетински, пејач со богата кариера што се протегала низ речиси шест децении, почина на 15 октомври по долга и тешка болест. Тој беше татко на познатиот пејач Тони Цетински и на Матео Цетински.
Неговото заминување означува крај на една значајна музичка приказна, исполнета со концерти, патувања и песни што оставија белег кај публиката во регионот. Семејството во овие тешки моменти одлучило да се збогува со него во приватна атмосфера, без присуство на јавноста.
Мирко Цетински е роден во Пула во 1948 година. Низ годините изградил кариера што го однела на бројни музички сцени, а во седумдесеттите години стекнал голема популарност низ поранешна Југославија. Поради својот глас и музичкиот израз, во јавноста го споредувале со познатиот шпански пејач Хулио Иглесијас.
Редовно настапувал на значајни музички фестивали, меѓу кои „Мелодии на Истра и Кварнер“ и Загрепскиот фестивал. Неговиот репертоар вклучувал песни како „Моје лудо срце“, „Плачи, плачи, гитаро“, „Пођи са мном до Ровиња“ и „Купил сам ти прстенац“, кои останале поврзани со неговото музичко име.
Неговиот успех не застанал на границите на поранешната држава. Во текот на кариерата реализирал дури 24 турнеи во Соединетите Американски Држави, четири во Австралија, а настапувал и низ бројни европски градови. Посебно се издвојуваат и околу 400 настапи во тогашниот Советски Сојуз.
И покрај долгите патувања и меѓународните ангажмани, Ровињ имал посебно место во неговиот живот. Градот останал неговото прибежиште и средина со која бил тесно поврзан и приватно и професионално.
Цетински оставил трага и во развојот на локалниот медиумски живот. Тој бил меѓу основачите на Радио Ровињ, кое започнало со работа на 14 февруари 1997 година.
Неговиот придонес кон културниот и јавниот живот на градот бил препознаен и со Златната медалја на Градот Ровињ, што му била доделена во 2023 година. Признанието го посветил на својот роден град и на луѓето со кои го поврзувал животот.
Последното испраќање на Мирко Цетински ќе се одржи во присуство на најблиските членови на семејството. Неговите роднини побарале почитување на приватноста додека се соочуваат со загубата.
Информациите за датумот и местото на комеморацијата ќе бидат соопштени дополнително.
Веста ја пренесува Plusinfo.mk
