Добри вести за земјоделците кои се опфатени со мерките за органско производство. Надлежните институции информираат дека започна реализацијата на финансиската поддршка за корисниците од Програмата за органско производство за 2024 година.
Преку Агенцијата за финансиска поддршка во земјоделството и руралниот развој досега се реализирани исплати во вкупна вредност од 15.372.229 денари, а средствата се распределени кај 987 корисници.
Најголемиот дел од исплатените средства се однесува на трошоците поврзани со сертификацијата за органско производство. За оваа намена се исплатени 9.589.057 денари на 808 корисници.
Финансиска поддршка е обезбедена и за анализа на почвата, при што на пет корисници им се исплатени вкупно 26.830 денари.
Средства добија и корисници кои се занимаваат со трговија и преработка на органски производи. За трговија се исплатени 963.997 денари на 16 корисници, додека за преработка на органски производи се издвоени 185.904 денари за три корисници.
Дополнителни 4.606.441 денар се исплатени на 155 корисници со овошни насади.
Од Министерството за земјоделство, шумарство и водостопанство посочуваат дека станува збор за финансиска поддршка наменета за развој и унапредување на органското производство.
Корисниците кои се опфатени со овие мерки можат да ги проверат своите трансакциски сметки и да проверат дали средствата веќе им се легнати.
Веста ја пренесува Direkten.mk
