Основниот кривичен суд ги прифати предложените мерки на претпазливост од Обвинителството за тројцата осомничени за бруталниот напад врз 14-годишно момче во скопската населба Ченто. Според сомнежите, тие физички го нападнале малолетникот и му нанеле седум убодни рани со нож.
И покрај сериозноста на случајот, осомничените не се гонат за обид за убиство, туку за кривично дело насилство врз дете. Судот им ги изрече следните мерки на претпазливост:
- забрана за напуштање на местото на живеење или престој;
- обврска за редовно јавување кај надлежно службено лице;
- привремено одземање на патните исправи за преминување на државната граница;
- забрана за посетување на локацијата каде што се случил нападот;
- забрана за каков било контакт или приближување до оштетеното дете и неговите родители.
Од Основното јавно обвинителство информираат дека истрагата сè уште е во тек и дека се преземаат дополнителни активности за целосно расчистување на случајот. Побарана е целокупната медицинска документација, се очекува резултатот од медицинското вештачење, а паралелно се вршат и други истражни дејствија и анализа на доказите собрани на местото на настанот.
Нападот се случил на 22 јуни во Ченто, додека Министерството за внатрешни работи поднело кривична пријава 11 дена подоцна.
Мајката на повреденото момче претходно изрази незадоволство од правната квалификација на случајот, наведувајќи дека, покрај ножевите, еден од напаѓачите наводно носел и автоматска пушка. Таа смета дека тежината на нападот не соодветствува со делото за кое се гонат осомничените.
Веста ја пренесува Слободен печат.
